Beskrywing

Earthy Inn is 'n knus selfsorgkothuis met 'n privaat ingang op die eienaar se eiendom in Wingate Park wat sowat 15 km vanaf Pretoria se sakekern is. Dit kan 'n ideale opsie wees vir 'n paartjie of 'n klein gesin aangesien dit naby baie geriewe en besienswaardighede geleë is.

Dié kothuis bied gerieflike slaapplek vir 4 gaste op 'n slag en beskik oor 'n slaapkamer met 'n en suite-badkamer. Die slaapkamer is ingerig met 'n koningingrootte-bed en die badkamer is toegerus met 'n stort, wasbak en toilet. Linne word voorsien; gaste moet egter hul eie handdoeke saambring.

Die leefarea beskik oor 'n kombuisie wat toegerus is met 'n eenplaatgasstoof, mikrogolfoond, yskas-vrieskas, broodrooster, eetgerei en breekware asook tee- en koffiemaakgeriewe. Van die kombuis af lei 'n sitkamer met 'n dubbelslaapbank.

Buite is daar 'n privaat tuinruimte met buitesitplek en braaigeriewe waar gaste met 'n skemerkelkie kan ontspan. Gaste kry veilige parkeerplek op die perseel vir 1 voertuig. Die ligging van hierdie eiendom is ongeveer 10 km vanaf winkelsentrums, 'n poskantoor, wegneemete-restaurante, 'n wildreservaat, 2 hospitale en 3 gholfbane.