Beskrywing

Pamela's View is 'n lieflike selfsorgkothuis met 'n privaat ingang op die eienaar se eiendom wat in die hartjie van Ocean View Heights, Struisbaai geleë is. Dit kan 'n goeie opsie wees vir 'n gesinswegbreek aan die kus van die Overberg, want dit spog met 'n see-uitsig in die verte en is net 'n entjie van die strand af.

Dié eenheid bied gerieflike slaapplek vir 4 gaste op 'n slag en beskik oor 2 slaapkamers en 'n badkamer. Die eerste slaapkamer is ingerig met 'n dubbelbed en die tweede slaapkamer het 'n koningingrootte-bed. 'n Stort, wasbak en toilet is in die badkamer beskikbaar. Alle linne en badhanddoeke word voorsien; gaste moet egter hul eie strandhanddoeke saambring.

Die leefarea beskik oor 'n kombuis wat toegerus is met 'n stoof, oond, mikrogolf, yskas-vrieskas, eetgerei en breekware asook tee- en koffiemaakgeriewe. Die sitkamer het gemaklike sitplek en 'n TV. Toegang tot gratis WiFi is beskikbaar.

Boonop het hierdie eenheid 'n privaat binnenshuise vermaakarea met 'n etenstafel en 'n ingeboude braai wat 'n wonderlike plek is vir gaste om hul maaltye saam te geniet. Gaste kan pragtige sonsopkomste en sonsondergange sien direk vanuit die gemak van die slaapkamers en sitkamer. Tydens beurtkrag word hierdie eiendom deur sonpanele gerugsteun, terwyl slegs die stoof van Eskom-krag afhanklik is.